Rusarminfo Российско-Армянское информационное агентство
ՌՈՒՍԱՐՄԻՆՖՈ-ի եթերում ՀՀ ԱԺ Արտաքին հարաբերությունների մշտական հանձնաժողովի անդամ Մարիա Կարապետյանն ընդգծել է, որ Արցախի հիմնախնդիրը տարածքային հակամարտություն չէ, հետևաբար Ադրբեջանի հետ սահամանագծումը չի ազդի հակամարտության կարգավորուման վրա։
Նա նշել է, որ Արցախի ժողովրդի ինքնորոշման գործընթացը Հայաստանի և Ադրբեջանի միջև տարածքային վեճի արդյունք չէ։
«Արցախի սահմանների որոշման այլ ձևաչափ կա։ Սահմանազատման և սահմանագծման գործընթացը չպետք է կապել արցախյան հակամարտության հետ: Արցախի հարցը չի կարգավորվել, այս մասին մեկ անգամ չէ, որ խոսել են ԵԱՀԿ Մինսկի խմբի համանախագահները։ Կոմունիկացիաների ապաշրջափակման գործընթացը ձեռնտու է մեզ, և այս խնդիրը կարևոր է, այդ թվում՝ միջազգային բեռնափոխադրումների համար»,- նշել է պատգամավորը։
Կարապետյանը հայտարարել է նաև, որ «3 + 3» ձևաչափը (Հայաստան, Վրաստան, Ադրբեջան, Ռուսաստան, Թուրքիա, Իրան) կապված չէ Արցախի հարցի և սահմանագծման խնդրի հետ։ Նրա խոսքով, պետք է հասկանալ, թե ինչ գործառույթ է ունենալու այս ձևաչափը։ Պատգամավորը հավելել է, որ Հայաստանին անհրաժեշտ է երկխոսություն հարևանների հետ` նույնիսկ պատերազմ վարելու համար։
Ավելի վաղ ՌՈՒՍԱՐՄԻՆՖՈ-ի եթերում Մարիա Կարապետյանը մեկնաբանել էր, Հայաստանի և Ադրբեջանի միջև ստորագրման նախապատրաստվող նոր համաձայնագրի վերաբերյալ մամուլի հրապարակումները։
