Ակադեմիկոս-թուրքագետ Ռուբեն Սաֆրաստյանը կարծում է, որ Թուրքիան դժգոհ է արցախյան 44-օրյա պատերազմի արդյունքներից։
ՌՈՒՍԱՐՄԻՆՖՈ-ի եթերում «Օրը Նվեր Մնացականյանի հետ» հաղորդման շրջանակներում Սաֆրաստյանն ասել է, որ պատերազմից հետո թուրքերը ցանկանում էին մասնակցել խաղաղապահ առաքելությանը հենց Արցախում։
«Թուրք առաջնորդները ցանկանում էին ստեղծել ռուս-թուրքական համատեղ խաղաղապահ զորախումբ։ Եվ այդ խաղաղապահները պետք է գործեին սիրիական մոդելով՝ համատեղ պարեկություն իրականացնելով Արցախի տարածքում։ Ռուսները դա թույլ չտվեցին»,- հայտարարել է թուրքագետը։
Փորձագետը նշել է, որ թուրքերը ևս մեկ պահանջ ունեին․ Աղդամի ռուս-թուրքական մոնիթորինգի կենտրոնի թուրք սպաները պետք է մուտք ունենային Արցախի տարածք և հենց այնտեղից էլ մշտադիտարկում իրականացնեին։
Սաֆրաստյանն ընդգծել է, որ Մոսկվան այս պահանջի հետ ևս համաձայն չի եղել, արդյունքում մշտադիտարկումն իրականացվում է տեխնիկական միջոցների օգնությամբ։
Ավելի վաղ ՌՈՒՍԱՐՄԻՆՖՈ-ն հայտնել էր, որ Հայաստանի արտգործնախարարության մամուլի քարտուղար Վահան Հունանյանը մեկնաբանել է Հայաստանի և Թուրքիայի միջև հարաբերությունների կարգավորման գործընթացը։
Մանրամասները՝ տեսանյութում։