Հայաստանի արտգործնախարար Արարատ Միրզոյանը «Nouvelles d’Arménie»-ին տված հարցազրույցում ասել է, որ Երևանը պատրաստ է կարգավորել Անկարայի հետ հարաբերություններն առանց նախապայմանների։
«Հայաստանի և Թուրքիայի միջև դիվանագիտական հարաբերությունների բացակայությունը, փակ սահմանները, ինչպես նաև Թուրքիայի բացահայտ մասնակցությունը 44-օրյա պատերազմին, այսպես կոչված «Զանգեզուրի միջանցքի» մասին Անկարայի վերջին հայտարարությունները բացասաբար են անդրադառնում տարածաշրջանի կայունության վրա»,-շեշտել է Միրզոյանը։
Նա նշել, որ, այնուամենայնիվ, վարչապետ Նիկոլ Փաշինյանն իր ելույթներում արտահայտել է հայկական կողմի դիրքորոշումը՝ եթե Թուրքիան պատրաստ է կարգավորել հարաբերությունները և ձեռնարկել համապատասխան քայլեր, Հայաստանը պատրաստ է քննարկել երկկողմ հարաբերություններ կառուցելու հնարավորությունները։
Նախարարը հարկ է համարել նշել, որ այս պահին Թուրքիայի հետ բանակցություններ չկան։
Ավելի վաղ ՌՈՒՍԱՐՄԻՆՖՈ-ն հայտնել էր, որ Թուրքիայի նախագահ Ռեջեփ Էրդողանը հայտարարել է, որ եթե Հայաստանը լուծի իր խնդիրները Ադրբեջանի հետ, Անկարայի համար խոչնդոտներ չեն լինի Երևանի հետ հարաբերությունները կարգավորելու հարցում։