Ավստրալիայի Հայ դատի հանձնախումբը հայտնում է, որ ավստրալացի պատգամավոր Ջոն Ալեքսանդրը երկրի Ներկայացուցիչների պալատում անդրադարձել է Արցախի դեմ Ադրբեջանի ագրեսիային։
Նրա խոսքով, երբ 2019 թվականին այցելել է Արցախ, իրեն ցնցել է այս տարածքի հանդարտությունը, և դա այն դեպքում, երբ Արցախի մշտապես սպառնում էր հարևան երկիրը: Ալեքսանդրը զարմացած է իր այցելած քաղաքներում մարդկանց տոկունությունից և ուժից:
«Բայց ընդամենը մեկ տարի անց մենք տեսանք փախստականներով խցանված ճանապարհների ողբերգական պատկերները, որոնք ուղիղ համեմատական են գրեթե 100 տարի առաջ արված Հայոց ցեղասպանության տեսարաններին»,- իր ելույթում ասել է Ջոն Ալեքսանդրը:
Պատգամավորը մտահոգություն է հայտնել անցյալ տարի Ադրբեջանի հարձակումների հետևանքով առաջացած և մինչ օրս շարունակվող հումանիտար և քաղաքական ճգնաժամի կապակցությամբ։ Նա հայտարարել է, որ հրադադարը պետք է խստորեն պահպանվի, քանի որ Արցախում ապրող ժողովուրդը տառապում է։
«Այդ ժամանակից ի վեր ես տեղեկություններ եմ լսել, որ 100 000 խաղաղ հայ բնակիչներ վտարվել են իրենց տներից, 5000-ը սպանվել են, հարյուրավոր հայեր գերեվարվել են»,- ասել է Ալեքսանդրը:
Մինչ այդ Ավստրալիայի պաշտպանության նախկին նախարար Ջոել Ֆիցգիբոնը նույնպես կոչ էր արել Ավստրալիայի կառավարությանը դատապարտել խաղաղ Արցախի դեմ Ադրբեջանի ագրեսիան:
Ավելի վաղ ՌՈՒՍԱՐՄԻՆՖՈ-ն հայտնել էր, որ Ամերիկայի Հայ դատի հանձնախումբը (ANCA) կոչ է արել Կոնգրեսի Սենատի և Ներկայացուցիչների պալատի առանցքային հանձնաժողովներին հետաքննել Պետքարտուղարության համակարգային ձախողումները տարածաշրջանային քաղաքականության և Հայաստանի նկատմամբ երկկողմ քաղաքականության հարցում: