Rusarminfo Российско-Армянское информационное агентство
Ամենայն Հայոց Կաթողիկոս Գարեգին Երկրորդի գլխավորած պատվիրակությունը Հռոմում հանդիպել է Վատիկանի պետքարտուղար կարդինալ Պիետրո Պարոլինի հետ:
ՀՀ Մարդու իրավունքների պաշտպան Արման Թաթոյանը կարդինալին զեկույց է ներկայացրել Ադրբեջանում հայ ռազմագերիների խոշտանգումների և անմարդկային վերաբերմունքի վերաբերյալ:
Ըստ պաշտպանի գրասենյակի մամուլի ծառայության՝ Թաթոյանն ընդգծել է Ադրբեջանում պահվող հայ ռազմագերիներին հայրենիք վերադարձնելու անհրաժեշտությունը, մատնանշելով միջազգային պահանջների կոպիտ խախտումները, ինչպես նաև այն, որ նրանք պահվում են ռազմա-քաղաքական սակարկություններ իրականացնելու նպատակով:
Նա անդրադարձել է նաև պատերազմից հետո Հայաստանի ճանապարհներին ադրբեջանցի զինծառայողների անօրինական տեղակայմանը, ինչը վտանգում է հանրապետության քաղաքացիների կյանքն ու առողջությունը:
Օմբուդսմենը տեղեկացրել է, որ Գեղարքունիքի և Սյունիքի մարզերում Հայաստանի ինքնիշխան տարածք ներխուժելուց հետո հաճախակի են դարձել ընտանի կենդանիների գողությունը, խաղաղ բնակիչների դեմ սպառնալիքները, կրակոցները և այլ հանցավոր գործողությունները ադրբեջանցիների կողմից:
Հոկտեմբերի 5-ին Ամենայն Հայոց Կաթողիկոսը մեկնել է Իտալիա՝ մասնակցելու «Մարդիկ ինչպես եղբայրներ. Երկրի ապագան. Կրոններն ու մշակույթները երկխոսության մեջ» խորագիրը կրող միջեկեղեցական աղոթքի արարողությանը, որը կազմակերպել է Սանտ-Էջիդիո համայնքը: Այցի ընթացքում կաթողիկոսը կհանդիպի Հռոմի Ֆրանցիսկոս Պապին:
Ավելի վաղ ՌՈՒՍԱՐՄԻՆՖՈ-ն հայտնել էր, որ վերջին 30 տարվա ընթացքում առաջին անգամ Հայաստանի Նախագահը պաշտոնական այցով կմեկնի Իտալիա:
