Rusarminfo Российско-Армянское информационное агентство
Ազգային ժողովում լրագրողների հետ զրույցում Հայաստանի փոխվարչապետի պաշտոնակատար Մհեր Գրիգորյանը հայտնել է,որ հայկական կողմը տարածաշրջանում տրանսպորտային կապերի ապաշրջափակման հարցով քննարկումներում չի դիտարկել եւ չի դիտարկելու Ադրբեջանին միջանցք տրամադրելու վերաբերյալ հարցեր:
Անդրադառնալով Ադրբեջանի նախագահի հայտարարությանը, թե Զանգեզուրի միջանցքի շուրջ բանակցություններում կա առաջընթաց, Մհեր Գրիգորյանը վստահեցրել է՝ կամ կլինի ապաշրջափակում հայկական սուվերեն ենթակառուցվածքների օգտագործմամբ կամ չի լինի:
«Վստահեցնում եմ՝ «Միջանցքային տրամաբանության» հարցեր հայկական կողմը չի քննարկել եւ չի քննարկելու, քանի որ նման բան հնարավոր չէ: Եթե միջանցք ասելով՝ որոշ մարդիկ նկատի ունեն տրանսպորտային ուղիներ, մի հարց է, սակայն, եթե նկատի ունեն սուվերենության հետ կապված որևէ աստիճանի, որևէ ազդեցություն, վստահեցնում եմ, որ դա բացառվում է իմ քննարկումների ընթացքում», – ասել է Գրիգորյանը:
Անդրադառնալով վերջերս գերեվարված 6 հայ զինծառայողի մասին հարցին՝ փոխվարչապետի պաշտոնակատարն ասել է, որ այդ հարցը միշտ ուշադրության կենտրոնում է եւ շուտով լուծում կստանա:
Մհեր Գրիգորյանն անդրադարձել է նաեւ եռակողմ հանձնաժողովի աշխատանքների դադարեցմանը, նշելով,որ Երեւանը հնարավոր չի համարում արդյունավետ աշխատել եռակողմ աշխատանքային խմբի ձևաչափով ՝ հաշվի առնելով սահմանին ստեղծված իրավիճակը:
Ավելի վաղ ՌՈՒՍԱՐՄԻՆՖՈ-ն հայտնել էր,որ վարչապետի պաշտոնակատար Նիկոլ Փաշինյանն հայտարարել էր՝ Հայաստանը երբեք համաձայնություն չի տալու Հայաստանի տարածքով «Զանգեզուրյան միջանցք» բացելու վերաբերյալ:
