Ամերիկյան Wall Street Journal օրաթերթը, հղում անելով պաշտոնական աղբյուրներին, ապրիլի 21-ին հայտնել է ԱՄՆ նախագահ Ջո Բայդենի՝ Օսմանյան կայսրությունում Հայոց ցեղասպանությունը պաշտոնապես ճանաչելու մտադրության մասին:
Պարբերականը հիշեցնում է, որ մարտին ԱՄՆ Սենատի միջազգային հարաբերությունների հանձնաժողովը նախագահին կոչ էր արել ճանաչել Հայոց ցեղասպանությունը ։ Նշվում է, որ 2020 թվականին Ջո Բայդենն արդեն ճանաչել է Հայոց ցեղասպանության փաստը, բայց ոչ պաշտոնապես, իսկ այժմ նա հնարավորություն ունի ապրիլի 24-ի ամենամյա ուղերձում օգտագործել «ցեղասպանություն» եզրույթը՝ արդեն լինելով ԱՄՆ նախագահ:
Հայոց ցեղասպանության 106-րդ տարելիցի նախաշեմին 106 ամերիկացի կոնգրեսականներ, իրենց հերթին, նամակ են գրել Բայդենին, որում հիշեցրել են նախագահին այն մասին, որ նախընտրական արշավի ժամանակ նա խոստացել է պաշտոնապես ճանաչել Օսմանյան կայսրությունում Հայոց ցեղասպանության փաստը:
Ավելի վաղ ՌՈՒՍԱՐՄԻՆՖՈՆ հայտնել էր, որ Ջո Բայդենի վարչակազմը ապրիլի 20-ին պատասխանել է հայ պատմաբանների բաց նամակին ԱՄՆ-ի կողմից Հայոց ցեղասպանության ճանաչման վերաբերյալ: