Նա ավելին է քան ֆուտբոլիստ. ՀՖՖ-ն և Կապարոսը շնորհակալություն են հայտնել Մխիթարյանին Տեսանյութ

Հայաստանի ֆուտբոլի ֆեդերացիան շնորհակալություն է հայտնել ազգային հավաքականի նախկին ավագ Հենրիխ Մխիթարյանին, որը որոշել է ավարտել մրցելույթներն ազգային թիմում։

ՀՖՖ-ն ֆեյսբուքյան իր էջում տեսանյութ է հրապարակել, որտեղ ցուցադրվում են Մխիթարյանի վերջին 15 տարիների լավագույն գոլերը։

Հայաստանի ֆուտբոլի ազգային հավաքականի գլխավոր մարզիչ Խոակին Կապարոսը նույնպես մեկնաբանել է Մխիթարյանի՝ կարիերան ավարտելու որոշումը՝ նշելով, որ մարտի 3-ը տխուր օր է հայկական ֆուտբոլի համար։

«Ինձ բախտ է վիճակվել վայելել Մխիթարյանի խաղն ու մարզումները: Նրա հետ աշխատած բոլոր մարզիչները պատմում են նրա նվիրվածության ու պրոֆեսիոնալիզմի մասին։ Ինձ համար մեծ պատիվ էր մարզել նման խաղացողի»,-ասել է Կապարոսը։

Նա ընդգծել է, որ Հենրիխը հայկական ֆուտբոլի առաջատարն է և ավելին է, քան պարզապես ֆուտբոլիստը։

Ավելի վաղ ՌՈՒՍԱՐՄԻՆՖՈ-ն հայտնել էր, որ «Ռոմայի» կիսապաշտպան Հենրիխ Մխիթարյանը մարտի 3-ին հայտարարել է Հայաստանի ազգային հավաքականում կարիերան ավարտելու մասին։