Ինչպես հայտնում է Հայաստանի Հանրապետության պաշտպանության նախարարությունը դեկտեմբերի 9-ի երեկոյան մի խումբ քաղաքացիներ փակել են Վարդենիսից Երևան տանող ավտոճանապարը։
Գեղարքունիքի մարզում ներքաղաքական խնդիրներով բողոքի ակցիա իրականացնող մարդիկ, նախօրոք տեղեկանալով, որ քիչ հետո այդ ճանապարհով անցնելու է ադրբեջանական կողմի կրակոցների հետևանքով վիրավորված զինծառայողներից մեկին Երևանի կենտրոնական կլինիկական զինվորական հոսպիտալ տեղափոխող մեքենան, զորամիավորման հրամանատարի տեղակալին հայտարարել են, որ խոչընդոտելու են նշված մեքենայի ընթացքը։
Այդ պատճառով մեքենան ստիպված Երևան է հասել շրջանցող ճանապարհով, ինչի հետևանքով էապես ուշացել է զինծառայողին ժամանակին և անհրաժեշտ բուժօգնության ցուցաբերումը։
«Պաշտպանության նախարարությունն անընդունելի է համարում կատարվածը և հիշեցնում, որ զինված ուժերը դուրս են քաղաքականությունից և ապահովում են Հայաստանի Հանրապետության շուրջօրյա անվտանգությունը»,- ասված է հաղորդագրության մեջ։
Նշվում է նաև, որ Հայրենիքի պաշտպանության ժամանակ վիրավորված զինծառայողներին բուժօգնություն ցուցաբերելու գործառույթի խոչընդոտումը՝ անկախ պատճառներից, դուրս է բարոյականության սահմանից։
Ավելի վաղ ՌՈւՍԱՐՄԻՆՖՈ-ն հայտնել էր, որ ադրբեջանական զինուժի գնդակոծության արդյունքում թեթև հրազենային վնասվածքներ են ստացել հայկական կողմի երկու զինծառայող։