Հունաստանի հայերը չեզոքացրել են որպես գովազդ ներկայացվող ադրբեջանական քարոզչությունը
Հունաստանի հայ համայնքի ներկայացուցիչները կարողացել են չեզոքացնել ադրբեջանական քարոզչությունը։
Սալոնիկ քաղաքում հասարակական տրանսպորտի վրա հայտնվել է ադրբեջանական գովազդ՝ «Շուշին Ադրբեջան է» գրառմամբ։
Սա չի վրիպել Հունաստանի հայ համայնքի ներկայացուցիչների աչքերից։ Նրանք արագ արձագանքել են և Սալոնիկի քաղաքային իշխանություններից պահանջել արգելել այդ ավտոբուսների երթևեկությունը։ Հարցին միջամտել է նաև Հունաստանում Հայաստանի դեսպանությունը։
ՌՈՒՍԱՐՄԻՆՖՈ-ի հարցմանն ի պատասխան՝ Հունաստանում Հայաստանի դեսպանատնից հայտնեցին, որ ադրբեջանական գովազդով ավտոբուսներն արդեն դուրս են բերվել երթևեկությունից։ Դեսպանատան միջամտությունից հետո Սալոնիկի քաղաքային իշխանություններն արգելել են ադրբեջանական գովազդով ավտոբուսները։
Ավելի վաղ ՌՈՒՍԱՐՄԻՆՖՈ-ն հայտնել էր, որ Ավստրալիայի Հայ Դատի հանձնախումբը տեղեկացրել է, որ Սիդնեյի գովազդային վահանակներից հանվել են դեպի Արցախի՝ Ադրբեջանի կողմից օկուպացված տարածքներ շրջագայություններ կազմակերպելու մասին գովազդը։