Հայերենը Ադրբեջանում դարձել է «մոդայիկ» լեզու. փորձագետը խոսել է Արցախին վերաբերող ռիսկերի մասին Տեսանյութ

ՌՈւՍԱՐՄԻՆՖՈ-ի եթերում ադրբեջանագետ Տարոն Հովհաննիսյանը խոսել է Ադրբեջանում հայոց լեզվի ինտենսիվ ուսումնասիրության մասին։

Ըստ Հովհաննիսյանի՝ պատճառները մի քանիսն են․ դա «մոդայիկ» է և ֆինանսավորվում է ներքին ադրբեջանական միջոցներով: Հայոց լեզվի իմացությունը կարող է օգտակար լինել նաև ռազմական գործողությունների ժամանակ։

«Կա նաև շատ վտանգավոր միտում։ Նրանք փորձում են ազդել Արցախի ժողովրդի վրա։ Եվ նրանք շարունակելու են աշխատել այս ուղղությամբ՝ հետապնդելով Արցախն ամբողջությամբ կլանելու նպատակ», – ասել է Տարոն Հովհաննիսյանը։

Փորձագետը նշել է, որ ադրբեջանցիների կողմից հայոց լեզվի նկատմամբ հետաքրքրությունը բացատրվում է մեկ վերջնական նպատակով՝ գրավել ամբողջ Արցախը։

Ավելի վաղ ՌՈՒՍԱՐՄԻՆՖՈ-ի եթերում Տարոն Հովհաննիսյանը մեկնաբանել էր Ադրբեջանի կողմից շարունակվող ագրեսիվ քաղաքականությունը։