Արցախում վիրավորվածների առողջական վիճակում դրական տեղաշարժ կա

Շուշիի մոտակայքում ադրբեջանցի զինծառայողի արձակած կրակոցներից պարանոցի շրջանում վիրավորում ստացած Գևորգ Մելքումյանի վիրահատությունը բարեհաջող է անցել։

Արցախի հանրապետության Առողջապահության նախարարության փոխանցմամբ՝ Գևորգն արդեն կարողանում է ինքնուրույն շնչել, առանց արհեստական շնչառական ապարատի։ Նրա վիճակը գնահատվում է կայուն ծանր։

Մյուս երկու վիրավորների՝ Արմեն Սարգսյանի և Գարիկ Ղազարյանի առողջական վիճակը բժիշկները գնահատում են միջին ծանրության։

Կորոնավիրուսի համաճարակի տարածումից խուսափելու համար վիրավորների ծնողներն առայժմ չեն կարող այցելել նրանց, սակայն Արցախի առողջապահության նախարար Միքայել Հայիրյանը վստահեցրել է, որ վիրավորները գտնվում են բժիշկների լիարժեք վերահսկողության տակ և նրանց կյանքին վտանգ չի սպառնում։

Ավելի վաղ ՌՈՒՍԱՐՄԻՆՖՈ-ն հայտնել էր, որ Արցախի հանրապետության Քննչական կոմիտեն հայտարարություն է տարածել նախօրեին Շուշիի մոտակայքում ադրբեջանցի զինծառայողի արձակած կրակոցների վերաբերյալ։