Տոնոյանի փաստաբանները կարծում են, որ ԱԱԾ-ն փորձում է վերակենդանացնել «փլուզված գործը»

ՀՀ պաշտպանության նախկին նախարար Դավիթ Տոնոյանի փաստաբանական խումբը հայտարարություն է տարածել:

Փաստաբանները տեղեկացնում են, որ Դավիթ Տոնոյանի քրեական գործով ԱԱԾ-ն կալանավորել է ՀՀ ՊՆ ավիացիայի վարչության ավիացիոն տեխնիկական գույքի ծառայության պետ Արտյոմ Համբարյանին և ավիացիոն վարչության գլխավոր ինժեներ Վլադիմիր Բաբայանին։

Պաշտպանական կողմը կարծում է, որ ԱԱԾ-ն ամեն կերպ ցանկանում է Տոնոյանին հնարավորինս երկար պահել կալանքի տակ և «փլուզված գործի» վավերականության պատրանք ստեղծել։

«Ինչ վերաբերում է այն հաղորդագրությանը, թե գնված հրթիռների մի մասը որոշ ժամանակ անց ոչ պիտանի է եղել, ուզում ենք հայտնել, որ այդ տեղեկությունը ապակողմնորոշող է, քանի որ այն հերքվել է տվյալ դեպքի վերաբերյալ ձեռք բերված փաստերով»,-ասված է հաղորդագրության մեջ։

Փաստաբանների խումբը կոչ է արել ՀՀ վարչապետին քաղաքական կամք դրսևորել, որպեսզի գործն օբյեկտիվ քննվի և ճշմարտությունը բացահայտվի։

Ավելի վաղ ՌՈՒՍԱՐՄԻՆՖՈ-ն հայտնել էր, որ պաշտպանության նախկին նախարար Դավիթ Տոնոյանի մի խումբ փաստաբաններ պահանջել են հնարավորություն ընձեռել մասնակցելու Հայաստանի զինված ուժերին մատակարարվող զենք-զինամթերքի որակի փորձաքննությանը։