Կովկասի, տարածաշրջանային հակամարտությունների ևՀարավային Եվրոպայի հարցերով ԱՄՆ պետքարտուղարի օգնականի նորանշանակ տեղակալ Էրիկա Օլսոնը կայցելի Հայաստան, Ադրբեջան և Վրաստան տարածաշրջանային համագործակցության զարգացման և երկկողմ հարցերի քննարկման նպատակով:
Երևանյան այցի ժամանակ, նոյեմբերի 2-4-ը, Օլսոնը կմասնակցի Հարավային Կովկասում ԱՄՆ առաքելությունների ղեկավարների համաժողովին:
Համաժողովին կմասնակցեն նաև Հայաստանում ԱՄՆ դեսպան Լին Թրեյսին, Վրաստանում ԱՄՆ դեսպան Քելլի Դեգրանը, Ադրբեջանում ԱՄՆ դեսպան Լի Լիտցենբերգերը, ինչպես նաև կովկասյան բանակցությունների գծով գլխավոր խորհրդական Էնդրյու Շոֆերը և ԱՄՆ Միջազգային զարգացման գործակալության Վաշինգտոնի գրասենյակի փոխտնօրեն Ալեքսանդր Սոկոլովսկին:
«Մենք ուրախ ենք Վաշինգտոնի և տարածաշրջանի մեր գործընկերների հետ հանդիպումների վաղեմի ավանդույթը վերականգնելու հնարավորության համար: Մտքերի, գաղափարների և տեղեկությունների փոխանակումը մեզ կօգնի ավելի լավ համակարգել մեր քաղաքականությունը տարածաշրջանի բոլոր երեք երկրների հետ»,-նշվում է Հայաստանում ԱՄՆ դեսպանության հաղորդագրության մեջ:
Նշվում է նաև, որ բացի ներքին քննարկումներից, համաժողովի մասնակիցները հանդիպումներ կունենան Հայաստանի կառավարության և քաղաքացիական հասարակության ներկայացուցիչների հետ:
Ավելի վաղ ՌՈՒՍԱՐՄԻՆՖՈ-ն հայտնել էր, որ Ամերիկայի Հայ ազգային կոմիտեն (ANCA) քննադատել է Հայաստանում ԱՄՆ դեսպանատան մամուլի ծառայության գրառումը երկու երկրների միջև դիվանագիտական հարաբերությունների հաստատման 30-ամյակի կապակցությամբ: