Սյունիքը Հայաստանի 10 մարզերից մեկն է: Այն գտնվում է ՀՀ հարավում և սահմանակից է Արցախին, Իրանին և Ադրբեջանին: Սյունիքը հայտնի է նաև Զանգեզուր, իսկ ավելի վաղ նաև Սիսական անվամբ:
Մարզի տարածքը հիմնականում լեռնային է: Այստեղ շատ են բարձր լեռնագագաթներն ու կիրճերը: Սյունիքի ամենաբարձր լեռնագագաթը Կապուտջուղն է (3906 մ): Սյունյաց աշխարհի հայտնի լեռներից են Խուստուփը, Մեծ Իշխանասարը, Արամազդը, Բաղացսարը:
Սյունիքը աչքի է ընկնում բնական հարստություններով: Դեռևս հնագույն ժամանակներից այստեղ արդյունահանել են պղինձ և այլ գունավոր մետաղներ:
Քիչ չեն նաև անտառները, որոնցից հայտնի են հատկապես Մթնաձորը և Սոսու պուրակը: Անտառները հարուստ են եզակի բուսատեսակներով և կենդանիներով:
Սյունիքը հայտնի է իր պատմամշակութային հուշարձաններով եկեղեցիներով, վանքերով, բերդերով ու ամրոցներով:Դրանցից ամենանշանավորը, թերևս, Տաթևի վանքն է, որը մեծ մասսայականություն ունի տեղացի և օտարերկրացի զբոսաշրջիկների մոտ:
Սյունիքի մարզի վարչական կենտրոնը Կապան քաղաքն է: