Իրանի և Ադրբեջանի միջև լարվածության սրացման ֆոնին՝ Նախիջևանում անցկացվում են «Անքակտելի եղբայրություն 2021» թուրք-ադրբեջանական զորավարժությունները:
Ըստ Turkiyegazetisi պարբերականի՝ մարտավարական զորավարժությունները Թուրքիայի և Ադրբեջանի պատասխան են Նախիջևանի հետ սահմանին և Արաքս գետի շրջանում իրանական զորավարժություններին:
«Ադրբեջանի անվտանգության ծառայության պաշտոնաթող գնդապետ-փորձագետ Ադալետ Վերդիևը Իրանի թշնամական վերաբերմունքն անվանել է սարսափելի սխալ և ասել, որ Նախիջևանում անցկացվող զորավարժությունները ցնցող պատասխան են»,- գրում է պարբերականը:
Պարբերականի տվյալներով՝ վարժանքների փորձերի ժամանակ թուրքական ռազմական ինքնաթիռներն ու ուղղաթիռները թռել են Նախիջևանի օդային տարածքով:
Ավելի վաղ ՌՈՒՍԱՐՄԻՆՖՈ-ն հայտնել էր, որ Իրանը փակել է իր օդային տարածքը Ադրբեջանի օդուժի համար: