Համացանցում նոր լուսանկար է հայտնվել Շուշից, որը Ադրբեջանի վերահսկողության տակ է անցել 44-օրյա պատերազմի հետևանքով:
Լուսանկարում պատկերված է Ղազանչեցոց եկեղեցին` առանց գմբեթի:
Արցախի ՆԳՆ արտակարգ իրավիճակների պետական ծառայության մամուլի քարտուղար Հունան Թադևոսյանը գրել է, որ ադրբեջանցիները Շուշիի եկեղեցու գմբեթը հանել են մայիսի 9-ի Եռատոնի նախօրեին, երբ Արցախում նշում են Հայրենական Մեծ պատերազմում տարած հաղթանակը, Արցախի Պաշտպանության բանակի կազմավորումը և Շուշիի ազատագրումը (առաջին ղարաբաղյան պատերազմի ժամանակ):
Թադևոսյանի ֆեյսբուքյան գրառման ներքո օգտատերերից մեկը տեղադրել է եկեղեցու լուսանկարը՝ առանց գմբեթի:
Ավելի վաղ ՌՈՒՍԱՐՄԻՆՖՈՆ հայտնել էր, որ Շուշիի Ղազանչեցոց եկեղեցու դարպասներից անհետացել են հրեշտակների արձանները: