Ռուսաստանի գյուղատնտեսական վերահսկող մարմինը` Ռոսսելխոզնադզորը, Սոչիի օդանավակայանում հայտնաբերել է հայաստանյան «Արարատ իշխան»ընկերության կողմից ներկրված 200 կգ թառափը: Առգրավված ձուկն այրվել է:
RUSARMINFO-ի հետ զրույցում Կրասնոդարի երկրամասի Ադիգեյա Հանրապետության Ռոսսելխոզնադզորի ներկայացուցիչ Վիկտորիա Կոկոսյանը հայտնել է, որ թառափի առգրավման պատճառն այն է, որ հայկական ընկերության մոտ բացակայել է ՌԴ տարածք մթերք ներկրելու լիցենզավորման փաստաթուղթը: Ընկերությունը գրանցված չի եղել նաև Ռոսսելխոզնադզորի ձեռնարկությունների ցանկում:
RUSARMINFO-ի զրուցակիցը պարզաբանել է, որ ներկրող ընկերության ներկայացուցիչն անձամբ դիմում է ներկայացրել` խնդրանքով ոչնչացնել ապրանքը: Տեղում այրելու որոշումը կայացվել է ելնելով այն հանգամանքից, որ միակ վերամշակող ձեռնարկությունը տեղակայված է Սոչիից հեռու, և թառափն այնտեղ տեղափոխելը նպատակահարմար չի եղել:
Նշենք, որ Եվրասիական տնտեսական միությանը Հայաստանի անդամակցելուց հետո Ռուսաստանի տարածք անասնաբուժական վերահսկողությանը ենթակա մթերքներ կարող են ներմուծել միայն այն ձեռնարկությունները, որոնք ներառված են Ռոսսելխոզնադզորի ցանկում: Ընկերությունները կարող են ընդգրկվել նշյալ ցանկում ՀՀ Էկոնոմիկայի նախարարություն համապատասխան դիմում ներկայացնելուց հետո: