Ռուս-իսրայելցի ճանապարհորդ, բլոգեր և լրագրող Ալեքսանդր Լապշինը իր ֆեյսբուքյան էջում գրել է Երևանի կենտրոնում , Կասկադ համալիրի մոտակայքում գտնվող հին, անավարտ շինհրապարակի մասին:
«Ոչինչ չի փոխվելու մեկ տարվա, կամ հինգ տարվա, կամ երեսուն տարվա ընթացքում: Երեւանի սրտում գտնվող հսկայական սարսափազդու փոսը նման է փտած ատամի խոռոչի, բայց կարծես դա ոչ մեկին չի անհանգստացնում»,- գրել է Լապշինը:
Լապշինի խոսքով՝ հայկական պետությունն ունի իրավական գործիքներ այս օբյեկտի հետ կապված հարցը լուծելու համար, չնայած սեփականատիրոջ դիմադրությանը և ֆինանսական դժվարություններին:
«Եվ, ի դեպ, խորհրդային նախագիծն ավարտելու անհրաժեշտություն չկա: Բավական է, օրինակ, այս փոսը լցնել հողով և ծառ տնկել: Այն կդառնա մի գեղեցիկ զբոսայգի, որտեղից չքնաղ տեսարաններ կբացվեն դեպի Երևանի կենտրոնն ու Արարատը»,- հավելում է Լապշինը:
Հայաստանի ու Երևանի իշխանությունները պարբերաբար զեկուցում են Կասկադի գագաթին գտնվող անավարտ հատվածը վերակառուցելու պլանների մասին, բայց երկար տարիներ իրավիճակը չի փոխվում:
Ավելի վաղ ՌՈՒՍԱՐՄԻՆՖՈՆ հայտնել էր, որ Ալեքսանդր Լապշինը կադրեր է նկարել Հայաստանի և Վրաստանի սահմանին, որոնցում երևում են Ռուսաստանում գտնվող Կովկասյան լեռները: