Հայաստանում գտնվող ռուս-իսրայելցի հայտնի բլոգեր և ճանապարհորդ Ալեքսանդր Լապշինը Facebook-ի իր էջում հրապարակել է հայ-վրացական սահմանին արված մի տեսանյութ:
Լապշինը նշել է, որ այդտեղից կարելի է տեսնել ոչ միայն Վրաստանը, այլև Ռուսաստանը:
«Իսկ դուք գիտեիք, որ Հայաստանում կա մի լեռ, որից երևում է Ռուսաստանը։ Դա կատակ չէ: Այդ լեռը Վրացական Սադախլո գյուղի մոտ է, Հայաստանի և Վրաստանի սահմանին: Այստեղից երևում է վրացական Ռուսթավիի մետալուրգիական գործարանը և նույնիսկ Կովկասյան լեռնաշղթան, որտեղով անցնում է Վրաստանի և Ռուսաստանի սահմանը», – գրել է բլոգերը։
Ալեքսանդր Լապշինի խոսքով՝ դա «Հայաստանից Ռուսաստանի մի մասնիկը Վրաստանի վրայով տեսնելու եզակի հնարավորություն է» ։
Ավելի վաղ ՌՈՒՍԱՐՄԻՆՖՈՆ հայտնել էր, որ Ալեքսանդր Լապշինը հրապարակել է Եգիպտոսում Հայաստանի դեսպանատան լուսանկարը, որը գտնվում է Կահիրեի Զեմալեկ թաղամասի շքեղ առանձնատներից մեկում: