Caucasus Heritage Watch կազմակերպությունը ապրիլի 20-ին իր Twitter-ում արբանյակային լուսանկարներ է հրապարակել, որտեղ երևում է Արցախի Մարտակերտի շրջանի Վանքասար եկեղեցու մոտ տեղադրված ծանր տեխնիկան։
Քանի որ քրիստոնեական եկեղեցին գտնվում է պատերազմի արդյունքում Ադրբեջանի վերահսկողության տակ անցած տարածքում, կազմակերպությունը Բաքվից բացատրություններ է պահանջել հայկական եկեղեցուն սպառնացող վտանգի վերաբերյալ:
Հաղորդվում է նաև, որ եկեղեցուն հարակից ճանապարհի մյուս կողմում արդեն կառուցվել է նոր շինություն։
Իր գործունեության շրջանակներում Caucasus Heritage Watch-ը հետևում և փաստաթղթավորում է անհետացման վտանգի տակ գտնվող և վնասված մշակութային ժառանգությունը՝ օգտագործելով արբանյակային ճշգրիտ պատկերներ:
Ավելի վաղ ՌՈՒՍԱՐՄԻՆՖՈՆ հայտնել էր, որ Նատալի Լուազոն կոչ է արել միջազգային հանրությանը պահպանել հայկական մշակութային ժառանգության օբյեկտները Արցախի` Ադրբեջանի կողմից օկուպացված տարածքներում: