Արցախի կարգավիճակի հարցի բարձրացումը միջնորդները համարում են ապակառուցողական քայլ․ քաղաքագետ Տեսանյութ

Քաղաքագետ Դավիթ Ստեփանյանը մեկնաբանել է հայկական կողմի՝ Արցախի կարգավիճակի որոշման հարցը բարձրացնելու նպատակահարմարությունը։

ՌՈՒՍԱՐՄԻՆՖՈ-ի եթերում «Օրը Նվեր Մնացականյանի հետ» հաղորդման շրջանակներում Ստեփանյանը կարծիք է հայտնել, որ եթե 44-օրյա պատերազմից հետո՝ 2020 թվականի նոյեմբերի 9-ին Հայաստանի, Ռուսաստանի և Ադրբեջանի միջև եռակողմ համաձայնագրի ստորագրումից հետո դեռ հնարավորէր բարձրացնել Արցախի կարգավիճակի հարցը, ապա այսօր այն կդիտվի որպես ապակառուցողական քայլ ինչպես Ռուսաստանի, այնպես էլ Եվրոպայի կողմից։

Քաղաքագետը դա բացատրում է նրանով, որ միջնորդ երկրները և նույնիսկ այսօր անգործության մատնված ԵԱՀԿ Մինսկի խմբի համանախագահները նախընտրում են անորոշ ժամանակով հետաձգել Արցախի կարգավիճակի հարցը։

Քաղաքագետն անդրադարձել է նաև Հայաստանի և Ադրբեջանի միջև հարաբերությունների կարգավորման գործընթացի վերահսկմանը, և ըստ մասնագետի՝ այսօր դա չի հաջողվում ո՛չ Բրյուսելին, ո՛չ Մոսկվային։

«Նրանց միջև սուր մրցակցություն է գնում։ Հիմա մրցակցությունը գնում է ոչ թե իրականացման, այլ մոդերացիայի շուրջ։ Ինչ վերաբերում է բուն իրականացմանը, ապա կա միայն մեկ ճանապարհ՝ սահմանազատում, սահմանագծում, հաղորդակցությունների վերաբացում, և այստեղ որևէ խնդիր չկա։ Բայց կա հասկացություն, որ Արցախի կարգավիճակի հարցը պետք է հետաձգվի անորոշ ժամանակով, այն չպետք է լուծվի հիմա։ Հիմա,հենց այնպես Արցախի կարգավիճակի հարցը բարձրացնելը վատ տոն է լինելու»,- ասել է Ստեփանյանը։

Քաղաքագետը նշել է նաև, որ ուկրաինական իրադարձություններից հետո Մոսկվայի և Բրյուսելի միջև շփումները արցախյան հիմնախնդրի շուրջ դադարել են։ Եթե նախկինում այս հարցով շփում կար Ռուսաստանի և Ֆրանսիայի նախագահների, ինչպես նաև Վլադիմիր Պուտինի և Շառլ Միշելի միջև, ապա այսօր նրանց շփման միակ ուղին ըստ քաղաքագետի՝ Հայաստանի վարչապետ Նիկոլ Փաշինյանն ու Ադրբեջանի նախագահ Իլհամ Ալիևն են։

Ավելի վաղ ՌՈՒՍԱՐՄԻՆՖՈ-ն հայտնել էր, որ Ռուսաստանի արտգործնախարար Սերգեյ Լավրովը հունիսի 10-ին կժամանի Երեւան՝ մասնակցելու ՀԱՊԿ երկրների արտգործնախարարների խորհրդի նիստին։

Մանրամասները՝ տեսանյութում։