Երևանի մամուլի ակումբի նախագահ Բորիս Նավասարդյանը կարծում է, որ Արցախի գազամատակարարումը վերականգնելու Եվրոմիության պահանջն անհասցե է, քանի որ հայտարարությունից պարզ չէ՝ ԵՄ-ն դիմում է Հայաստանի՞ն, թե՞ Ադրբեջանին։
Հայաստանից Արցախ գնացող գազատարը վնասվել է 2022 թվականի մարտի 8-ին։ Գազատարի վերանորոգումից հետո ադրբեջանական կողմը մարտի 21-ին կրկին դադարեցրել է Արցախում բնակվող ավելի քան 100 հազար հայերի գազամատակարարումը։
ՌՈՒՍԱՐՄԻՆՖՈ-ի եթերում «Օրը Նվեր Մնացականյանի հետ» հաղորդման շրջանակներում Նավասարդյանը, մեկնաբանելով ԵՄ-ի անհասցե կոչը, նշել է, որ Եվրոպայում որոշում կայացնողներն այժմ զբաղված են ուկրաինական իրադարձություններով, իսկ Ադրբեջանն էլ օգտվում է ստեղծված իրավիճակից։
Ըստ փորձագետի՝ Բաքվի ագրեսիվ քաղաքականության հիմնական նպատակը հայկական զինված ուժերի դուրսբերումն է Արցախից, ինչպես նաև ակնարկը Ռուսաստանին, որ ըստ պաշտոնական Բաքվի՝ խաղաղապահներն այնտեղ «ավելորդ են»։
Բորիս Նավասարդյանի խոսքով՝ հայկական կողմն ունի Արցախը պաշտպանելու իր գաղափարը, որը տարբերվում է ադրբեջանականից և հնարավոր է նաև ռուսական դիրքորոշումից։ Ըստ փորձագետի՝ Մոսկվան պաշտոնապես չի հայտարարել, որ հայկական կողմն Արցախում պետք է վայր դնի զենքը, և դա վկայում է այն մասին, որ Ռուսաստանը կարծում է՝ արցախում ապրող հայերն ունեն ինքնապաշտպանության իրավունք։
Ավելի վաղ ՌՈՒՍԱՐՄԻՆՖՈ-ի եթերում Բորիս Նավասարդյանն ասել էր, որ հնարավոր չէ պաշտպանվել համաշխարհային քարոզչական պատերազմից, որն ընթանում է ուկրաինական իրադարձություններին զուգահեռ, հատկապես այնպիսի երկրներում, ինչպիսին Հայաստանն է։
Մանրամասները՝ տեսանյութում։