Ադրբեջանցիները դարձել են «Արցախի» հեղինակի մասին ստերի պատանդ․ Արա Գևորգյան Տեսանյութ

Հայտնի հայ կոմպոզիտոր, Հայաստանի վաստակավոր արտիստ Արա Գևորգյանը ՌՈՒՍԱՐՄԻՆՖՈ-ի եթերում պատմել է, թե ինչպես են ադրբեջանցիները փորձել իրենց վերագրել իր «Արցախ» ստեղծագործության հեղինակային իրավունքները։

Գևորգյանի խոսքով՝ 1997 թվականին ավարտել է «Արցախ» ստեղծագործության աշխատանքները, որտեղ դուդուկը կատարել է Ջիվան Գասպարյանը։ 1998 թվականին նա երաժշտության հեղինակային իրավունքը գրանցել է ԱՄՆ Կոնգրեսի գրադարանում։

Հետագա տարիներին Գևորգյանը մեկ անգամ չէ, որ անձամբ կատարել է ստեղծագործությունը։ 2002 թվականին Սոլթ Լեյք Սիթիում կայացած ձմեռային Օլիմպիական խաղերում ռուս գեղասահորդ Ալեքսանդր Ապտը ելույթ է ունեցել «Արցախ» երգի ներքո, չորս տարի անց Թուրինում՝ վրացի Էլենե Գեդևանիշվիլին ևս հանդես է եկել «Արցախ» ստեղծագործության ներքո։

«Բոլոր ելույթներում հայտարարվում էր՝ «երաժշտության հեղինակ Արա Գևորգյան»։ Եվ այս մասին ոչ մի կասկած չի եղել»,- ասել է նա։

Գևորգյանի խոսքով՝ ադրբեջանցիները սկսել են ուշադրություն դարձնել իր ստեղծագործությանը, երբ դրա տակ ելույթ է ունեցել ադրբեջանցի մարմնամարզուհի Դինարա Գիմատովան, ով իր դիմումի մեջ լրացրել է՝ «Արա Գևորգյան, Արցախ»։

Գևորգյանը պատմել է, որ Ռուսաստանի «Սառցե դարաշրջան» շոուի ժամանակ Ալեքսանդրա Սավելյովա և Սերգեյ Սախնովսկի զույգը սառույցի վրա ներկայացրել է «Հայկական հարսանիք» համարը, որտեղ «Արցախ»-ի հետ մեկտեղ հնչել է ադրբեջանական երաժշտություն։ Միևնույն ժամանակ հաղորդավարները հայտարարել են, որ գեղասահորդները հայկական պար են ներկայացնելու։

«Դրանից հետո բոլոր ադրբեջանցիները սկսել են զանգահարել իրենց դեսպան Փոլադ Բյուլ-Բյուլ Օգլուն, որը հետագայում լրատվամիջոցներին ասել է, որ Արա Գևորգյանը գողացել է ադրբեջանական երաժշտությունը՝ փոխելով անունը»,- պատմել է Գևորգյանը։

Կոմպոզիտորը նշել է, որ Բյուլ-Բյուլ Օգլին ավելի ուշ Հայաստանի մշակույթի նախարար Հասմիկ Պողոսյանի միջոցով ներողություն է խնդրել իրենից։

Սակայն, ըստ Գևորգյանի, ադրբեջանցիների հավակնությունները դրանով չեն սահմանափակվել. նրանք հորինել են մի պատմությունը, որ Գևորգյանը երաժշտություն է գողացել ադրբեջանցի կոմպոզիտոր Ֆիքրեթ Ամիրովից։

«Արդյունքում ադրբեջանական մամուլից տեղեկացա, որ տեղացի լրագրողները գնացել են Ամիրովների տուն, որտեղ կոմպոզիտորի որդին ասել է. ես արդեն հոգնել եմ կրկնելուց, բայց միևնույնն է օգուտ չկա։ Այս երաժշտությունը հայրս չի գրել»,- ասել է Գեւորգյանը։

Կոմպոզիտորի խոսքով՝ ադրբեջանցիները դարձել են իրենց ստերի պատանդը և չգիտեն՝ ինչպես դուրս գալ այդ իրավիճակից։

«Իրավիճակը բարդ է նրանց համար, քանի որ իմ ստեղծագործությունը ներառել են Բաքվի Եվրոպական խաղերում, իրենց գովազդներում, Բաքվի, ադրբեջանական բանակի, գորգերի մասին ֆիլմերում։ Այս բոլոր տեսահոլովակներում հենց իմ կոմպոզիցիան է օգտագործվել»,- նշել է կոմպոզիտորը։

Արդյունքում Արա Գևորգյանի նախաձեռնությամբ նկարահանվել է «Story about Artsakh music» ֆիլմը, որը պատմում է «Արցախ» ստեղծագործության ստեղծման ամբողջ պատմությունը։

Ավելի վաղ ՌՈՒՍԱՐՄԻՆՖՈ-ն հայտնել էր, որ հայկական համույթը «Հրաշքների դաշտ» շուի ամանորյա թողարկման ժամանակ կատարել է «Արցախ» ստեղծագործությունը։

Մանրամասները՝ տեսանյութում։