ՌՈՒՍԱՐՄԻՆՖՈ-ի եթերում Արցախի Հանրապետության արտաքին գործերի նախարար Դավիթ Բաբայանը հայտարարել է, որ հայկական և ադրբեջանական կողմերի միջև ցանկացած բանակցություն ողջունելի կլինի։
Մեկնաբանելով ԱՄՆ պետքարտուղար Էնթոնի Բլինքենի խոսքերը, թե անհրաժեշտ է հասնել արցախյան հակամարտության երկարաժամկետ և արդարացի լուծման, Բաբայանը նշել է, որ սա նոր տերմինաբանություն է, և ժամանակ է պետք հասկանալու՝ ինչ ասել է արդարացի լուծում, քանի որ յուրաքանչյուր կողմն ունի արդարության մասին իր պատկերացումները։
«Ամեն ինչ կախված է նրանից, թե ինչ կներդրվի այս հայեցակարգում։ Թե ինչ է սա նշանակում, ցույց կտա ժամանակը։ Ամեն ինչ կախված է նրանից, թե որ տեսանկյունից ենք մենք դիտարկում այս արդարադատությունը»,- ասել է ԱԳ նախարարը։
Բաբայանի խոսքով՝ արդարացի արդյունք, ինչ-որ չափով, կարող է լինել այն իրավիճակը, երբ կոնֆլիկտային հարցերի շուրջ կողմերը կարողանան հասնել փոխըմբռնման։
Ավելի վաղ ՌՈՒՍԱՐՄԻՆՖՈ-ի եթերում Դավիթ Բաբայանը և ռազմական փորձագետ Մհեր Հակոբյանը մեկնաբանել էին Հայաստանի և Արցախի շուրջ տեղի ունեցող իրադարձությունները։
Մանրամասները՝ տեսանյութում։