Rusarminfo Российско-Армянское информационное агентство
ՌՈՒՍԱՐՄԻՆՖՈ-ին տված հարցազրույցում ռազմական պատմաբան, քաղաքական գիտությունների դոկտոր Արմեն Այվազյանը խոսել է Հայաստանի վրա Ադրբեջանի վերջին հարձակման նպատակների մասին։
Նրա խոսքով՝ Թուրքիան և Ադրբեջանը նպատակ են դրել ուժով բռնազավթել Սյունիքը, որպեսզի կարողանան ուղիղ կապ հաստատել երկու երկրների միջև, և, եթե դա նրանց հաջողվի, կանցնեն նաև Հայաստանի մյուս տարածքների բռնազավթմանը։
«Հասկանալի էր, որ եթե մենք կորցնենք Արցախը, Սյունիքն անմիջապես հայտնվելու է վտանգի առաջ։ Արցախյան առաջին պատերազմում ոչ միայն արցախցիների ինքնորոշման պայքարն էր, այլև ամբողջ Հայաստանի երկարաժամկետ ռազմավարական անվտանգության հարցը»,- ասել է պատմաբանը։
Ըստ Արմեն Այվազյանի՝ Ադրբեջանի և Թուրքիայի նպատակն է շարունակական ճնշումների և սադրանքների միջոցով հասնել Հայաստանի՝ որպես պետության ոչնչացմանն ու բնակչության բնաջնջմանը՝ ֆիզիկական ոչնչացման կամ արտագաղթի միջոցով։
«Հայաստանի իշխանությունները տարիներ շարունակ ոչ մի քայլ չձեռնարկեցին Հայաստանի անվտանգությունը լիարժեք ապահովելու ուղությամբ։ Բոլորը խոսում էին միայն Արցախի կարգավիճակի դիմաց 7 շրջանները վերադարձնելու մասին»,- ասել է Այվազյանը։
Պատմաբանը վստահ է՝ սահմանի տարբեր հատվածներում շարունակվող անդադար կրակոցների ֆնոնին խաղաղության մասին խոսք լինել չի կարող․ Ադրբեջանն ինքը խաղաղություն չի ուզում։
Ավելի վաղ ՌՈՒՍԱՐՄԻՆՖՈ-ի եթերում ռազմական պատմամաբան Արմեն Այվազյանը խոսել էր ստեղծված իրավիճակից դուրս գալու Հայաստանի հնարավորությունների մասին։
Մանրամասները՝ տեսանյութում։
