ՀՀ Արտաքին գործերի նախարար Արարատ Միրզոյանը նոյեմբերի 17-ին ընդունել է Հայաստանում հավատարմագրված դիվանագիտական ներկայացուցչությունների ղեկավարներին։
Նախարարը մանրամասներ է ներկայացրել Հայաստանի նկատմամբ Ադրբեջանի իրականացրած ագրեսիայի վերաբերյալ։
«Երեկ հերթական անգամ ադրբեջանական զինված ուժերը ներխուժել են Հայաստանի Հանրապետության տարածք զրահատեխնիկայի, հրետանու, տարբեր տրամաչափի զինատեսակների կիրառմամբ։ Ադրբեջանական կողմը կիրառել է հավանաբար ամեն ինչ բացի օդուժից»,- ասել է Միրզոյանը։
Արարատ Միրզոյանը համոզմունք է հայտնել, որ Ադրբեջանի այս վարքագիծը հետևանք է այն բանի, որ մեր միջազգային գործընկերները և միջազգային հանրությունը պատշաճ և հասցեական չեն արձագանքել Ադրբեջանի կողմից ուժի կիրառմանը դեռ անցած տարի Արցախի դեմ սեպտեմբերի 27-ին սկսված ագրեսիայի ժամանակ։
«Կողմերի միջև հավասարության նշան դնող շարունակական հայտարարություններն Ադրբեջանի կողմից ուղղակիորեն ընկալվել են իբրև խրախուսանք՝ շարունակելու այդ վարքագիծը: Մենք ակնկալում ենք, որ մեր գործընկեր ու բարեկամ երկրներն անհապաղ և հասցեական կարձագանքեն այս գործողություններին և կկիրառեն իրենց անմիջական ազդեցությունն Ադրբեջանի վրա՝ հորդորելու դադարեցնել սադրիչ գործողությունները և ոտնձգությունները Հայաստանի նկատմամբ»,- հավելել է նախարարը։
Արարատ Միրզոյանը համոզմունք է հայտնել նաև, որ Ադրբեջանը, լարվածությունը տեղափոխելով Հայաստանի Հանրապետության տարածք, փորձում է շեղել միջազգային հանրության ուշադրությունը արցախյան հիմնախնդրից: Նախարարը վստահեցրել է՝ Հայաստանը պաշտպանելու է ինչպես իր տարածքային ամբողջականությունը, այնպես էլ Արցախի հայերի ինքնորոշման իրավունքը։
Արարատ Միրզոյանը դիվանագետներին տեղեկացրել է նաև, որ հայկական կողմն ունի հաստատված 1 զոհ, 12 գերեվարված զինծառայող, ևս 24 հայ զինծառայողի մասին տեղեկություններ չկան և ռուսական կողմի մասնակցությամբ ընթանում են որոնողական աշխատանքներ։
Ավելի վաղ ՌՈՒՍԱՐՄԻՆՖՈ-ն հայտնել էր, որ ՀՀ նախագահ Արմեն Սարգսյանը Սինգապուրում ներկայացրել է իրավիճակը հայ-ադրբեջանական սահմանին։