Rusarminfo Российско-Армянское информационное агентство
ՀՀ առողջապահության նախկին նախարար, ԱԺ պատգամավոր Արսեն Թորոսյանը ՌՈՒՍԱՐՄԻՆՖՈ-ի եթերում մեկնաբանել է հանրապետությունում Covid-19 համաճարակի հետ կապված իրավիճակը։
Թորոսյանի խոսքով, իրավիճակն այս պահին շատ ավելի վատ է, քան անցյալ տարի՝ պատերազմի ժամանակ։ Նա ընդգծել է՝ պատճառն այն է, որ Հայաստանում մարդիկ այնքան ակտիվ չեն պատվաստվում, որքան անհրաժեշտ է հիվանդությունը հաղթահարելու համար։
«Անցյալ տարի այս ժամանակ մենք ունեինք մոտավորապես նույն թվերը, ինչ հիմա: Գումարած մենք ունեինք մոտ 7500 վիրավոր։ Բայց այն ժամանակ իրավիճակն այնքան էլ տագնապալի չէր, մենք գլուխ էինք հանում։ Հիմա էլ չենք կարողանում՝ չնայած հիմա էլ վիրավորներ չկան, ինչպես անցյալ տարի էր»,- ասել է նա։
Արսեն Թորոսյանն ընդգծել է, որ համաճարակը հաղթահարելու միակ միջոցը զանգվածային պատվաստումներն են։
Նա վստահեցրել է, որ Հայաստանում կիրառվող բացարձակապես բոլոր պատվաստանյութերն անվտանգ են և արդյունավետ։
Ավելի վաղ ՌՈՒՍԱՐՄԻՆՖՈ-ն հայտնել էր, որ Եվրոմիությունը ճանաչել է Covid-19-ի դեմ պատվաստման վերաբերյալ Հայաստանի և Մեծ Բրիտանիայի վկայականները։
Մանրամասները` տեսանյութում:
