Հայաստանում Ֆրանսիայի նորանշանակ դեսպան Անն Լույոն այցելել է Ծիծեռնակաբերդի հուշահամալիր:
Հայոց Ցեղասպանության թանգարան-ինստիտուտի մամուլի ծառայության փոխանցմամբ՝ թանգարան-ինստիտուտի տնօրեն Հարություն Մարությանը հանդիպել է դեսպանին և ներկայացրել հուշահամալիրի ստեղծման պատմությունը:
Մարությանը հյուրերին պատմել է Ծիծեռնակաբերդի տարածքում տեղադրված երեք խաչքարերի պատմությունը, որոնք նվիրված են անցյալ դարավերջին Ադրբեջանի հայ բնակչության հալածանքների ժամանակ զոհվածների հիշատակին:
Անն Լույոն և պատվիրակության անդամները ծաղիկներ են դրել անմար կրակի մոտ և մեկ րոպե լռությամբ հարգել Հայոց Ցեղասպանության անմեղ զոհերի հիշատակը: Ցեղասպանության թանգարանում Լույոն ծանոթացել է մշտական և ժամանակավոր ցուցադրություններին, գրառում կատարել վաստակավոր հյուրերի գրքում, ինչպես նաև այցելել է «Ժանսեմ. Ցեղասպանության նկարիչ» խորագիրը կրող ցուցահանդես:
Ավելի վաղ ՌՈՒՍԱՐՄԻՆՖՈ-ն հայտնել էր, որ Անն Լույոն փոխարինել է Ջոնաթան Լաքոտին՝ Հայաստանում Ֆրանսիայի դեսպանի պաշտոնում: