Rusarminfo Российско-Армянское информационное агентство
Ռուսաստանում ՀՀ դեսպան Վարդան Տողանյանը ՌՈՒՍԱՐՄԻՆՖՈ-ի «Օրը Նվեր Մնացականյանի հետ » հաղորդման ժամանակ պատմել է Ռուսաստանի միգրացիոն օրենսդրության պահանջների մասին, որոնց համաձայն օտարերկրյա քաղաքացիները, այդ թվում`հայերը, պետք է մինչև հունիսի 15-ը գրանցեն իրենց կեցությունը Ռուսաստանում:
ՀՀ դեսպանը նշել է, որ Covid-19 համաճարակով և մուտքի ու ելքի սահմանափակումներով պայմանավորված, Ռուսաստանը մի քանի անգամ երկարացրել է օտարերկրյա քաղաքացիների՝ երկրում գտնվելու ժամկետը: Վերջնական ամսաթիվ հայտարարվել է 2021 թվականի հունիսի 15-ը:
Ըստ Տողանյանի, Ռուսաստանից արտքասվելու են Հայաստանի միայն այն քաղաքացիները, որոնք մինչև հունիսի 15-ը չեն գրանցվի իրենց բնակության վայրերում կամ պաշտոնապես աշխատանք չեն գտնի:
«Նրանք, ովքեր դա չեն անի, կարտաքսվեն: Բայց դա չի նշանակում, որ մարդկանց կբռնեն փողոցում և կվտարեն: Եթե նրանք փորձեն հեռանալ Ռուսաստանից, նրանց կանգնեցնելու են ելքի մոտ», – ասել է Տողանյանը:
Ռուսաստանում ՀՀ դեսպանը հավելել է, որ Ռուսաստանի օրենսդրության մեջ նորամուծություններ չկան, և գործում է նույն ընթացակարգը, ինչ մինչ համաճարակը:
Ավելի վաղ ՌՈՒՍԱՐՄԻՆՖՈ-ն հայտնել էր, որ Կազանում, Եվրասիական միջկառավարական խորհրդի շրջանակներում, տեղի է ունեցել հանդիպում Հայաստանի և Ռուսաստանի վարչապետներ Նիկոլ Փաշինյանի և Միխայիլ Միշուստինի միջև:
