Փաշինյանը հրաժարական տվեց․ Հայաստանը գնում է արտահերթ խորհրդարանական ընտրությունների

Այսօր, ապրիլի 25-ին, ՀՀ վարչապետ Նիկոլ Փաշինյանը հրաժարական է տվել:

 

Վարչապետի հրաժարականը պայմանավորված է արտահերթ խորհրդարանական ընտրություններ անցկացնելու անհրաժեշտությամբ:

 

Այսօրվա ուղերձում Փաշինյանը հիշեցրել է, որ մարտի 18-ին հանրապետության նախագահի և երկրի քաղաքական ուժերի հետ պայմանավորվածություն է ձեռք բերվել արտահերթ խորհրդարանական ընտրություններ անցկացնելու շուրջ:

 

«Այս պահին ես ուզում եմ մեկ անգամ ևս շեշտել, թե ինչու ենք անհրաժեշտ համարում անցկացնել արտահերթ խորհրդարանական ընտրություններ: 2020-ին մենք աղետալի իրադարձությունների միջով ենք անցել: Գրեթե բոլորը խոսում են կատարվածի պատճառների և հետևանքների մասին: Միակ սուբյեկտը, որը հնարավորություն չի ունեցել արտահայտել իր կարծիքը, ժողովուրդն է: Եվ ժողովուրդը պետք է հնարավորություն ունենա ասելու իր կարծիքը»,- իր ուղերձում ասել է Փաշինյանը:

 

Համաձայն ՀՀ Սահմանադրության՝ արտահերթ խորհրդարանական ընտրություններ անցկացնելու համար անհրաժեշտ է լուծարել խորհրդարանը: Իսկ խորհրդարանը լուծարելու համար գործող վարչապետը պետք է հրաժարական տա: Դրանից հետո, ըստ պայմանավորվածության, խորհրդարանը երկու անգամ չի ընտրում կառավարության նոր ղեկավար, և նշանակվում են արտահերթ խորհրդարանական ընտրություններ:

 

Արդեն ձեռք բերված պայմանավորվածության համաձայն՝ ՀՀ Ազգային Ժողովի առաջիկա արտահերթ ընտրությունները տեղի կունենան այս տարվա հունիսի 20-ին:

 

Ավելի վաղ RUSARMINFO- ն հայտնել էր, որ խորհրդարանի իշխող մեծամասնությունը արտահերթ նիստում փոխել է Ընտրական օրենսգիրքը՝ հրաժարվելով ռեյտինգային ընտրակարգից: