Ալեքսանդր Գուսև. «Հայաստանը ստուգում է միջազգային հանրության վերաբերմունքը Ադրբեջանի հանդեպ էմբարգո սահմանելու հարցում»

Անհրաժեշտ է ամբողջական էմբարգո սահմանել սպառազինության մատակարարման շուրջ Հարավային Կովկասի տարածաշրջանում, ասել է ՀՀ ԱԳ փոխնախարար Շավարշ Քոչարյանն ավստրիական «Die Presse» թերթին տված հարցազրույցում:

ՀՀ ԱԳ փոխնախարարի հայտարարությունը նպատակ էր հետապնդում ստուգելու միջազգային հանրության վերաբերմունքը նման էմբարգո սահմանելու հնարավորության շուրջ, նկատում է ՌԳԱ Եվրոպայի ինստիտուտի ԱՊՀ երկրների ռազմավարական զարգացման կենտրոնի ղեկավար Ալեքսանդր Գուսևը:

«Էմբարգոն ենթադրում է առևտրի ամեն տեսակի հանդեպ արգելքի սահմանում. այն, հետևաբար, ենթադրում է տնտեսական շրջափակում և իրագործելի է միայն համընդհանուր արգելքի համատեքստում կոնկրետ պետության հանդեպ», -RUSARMINFO-ի հետ զրույցում ասել է Ալ. Գուսևը:

Ըստ փորձագետի՝ չնայած ղարաբաղյան հակամարտության լարման, որևէ երկիր էմբարգո չի սահմանում Հարավային Կովկասում հակամարտության որևէ կողմի նկատմամբ:

 «Ինչ վերաբերում է Ռուսաստանին, ապա նրա կողմից էմբարգո սահմանելն անմիտ է, քանի որ ՌԴ-ն, բացի պայմանագրային պարտավորություններից կողմերի հանդեպ, ունի նաև սեփական շահերը», — նշել է Ալեքսանդր Գուսևը:

Ադրբեջանը զենք է գնում Ռուսաստանից 2000-ական թվականներից: 5 մլրդ դոլար արժողությամբ ամենախոշոր գործարքը կնքվել է 2013-14թթ.: Ապրիլի 2-ին մեկնարկած և հաջորդ օրերին ընթացող ռազմական գործողությունների շրջանում Ռուսաստանը հայտարարեց, որ մտադիր չէ դադարեցնել սպառազինությունների մատակարարումը Ադրբեջանին: