Սեմյոն Բաղդասարով. «Հայերին Թուրքիայից վտարելու մասին Էրդողանի հայտարարությունն իրատեսական է»

Էրդողանի սպառնալիքները Թուրքիայի հայ բնակչության հասցեին նորություն չեն, բայց ներկայումս դրանք ստանում են նոր և առավել վտանգավոր երանգներ, — ասում է Մերձավոր Արևելքի և Կենտրոնական Ասիայի երկրների ուսումնասիրության կենտրոնի տնօրեն Սեմյոն Բաղդասարովը:

«Որքանով հասկանում եմ, Էրդողանը բացահայտ սպառնում է առնվազն հայերի վտարմամբ Թուրքիայից: Սա Թուրքիայի բարձրաստիճան ղեկավարության կողմից արված առաջին հայտարարությունը չէ: «Վատ վարք դրսևորելու դեպքում, մենք ձեզ կվտարենք երկրից» սպառնալիքը տարբեր ժամանակներում օգտագործվել է Թուրքիայի ազգային փոքրամասնությունների նկատմամբ», — RUSARMINFO-ի հետ զրույցում ասել է Սեմյոն Բաղդասարովը:

Ըստ փորձագետի՝ ասվածն իր բնույթով քաղաքական հայտարարություն է, բայց չկա որևէ երաշխիք, որ խոսքերին կհաջորդեն կոնկրետ գործողությունները:

«Հայերի վտարումը կարելի է հեշտությամբ իրականացնել, քանի որ բազմաթիվ Հայաստանի քաղաքացիներ երկրի ծանր սոցիալ-տնտեսական իրավիճակի պատճառով անօրինական գտնվում են Թուրքիայում: Հայաստանի իշխանություններն իրենց կործանարար տնտեսական քաղաքականության պատճառով իրենք իրենց փակուղու մեջ են գցել, ինչն էլ օգտագործում է Էրդողանը», — նշել է Սեմյոն Բաղդասարովը:

Էրդողանի հայտարարությունն անկեղծացում է առ այն, որ Հայոց ցեղասպանությունից հարյուր տարի անց Թուրքիայի իշխանությունների մտածելակերպը չի փոխվել, ասել է ՀՀ ԱԳ փոխնախարար Շավարշ Քոչարյանը՝ մեկնաբանելով Էրդողանի այն խոսքերը, որ Հայաստանը կրակի հետ է խաղում՝ հաշվի չառնելով, որ Թուրքիայում բնակվում է մոտ 100 հազ. հայ, որոնցից 50 հազարը Թուրքիայի քաղաքացիներ չեն: