ՌԴ ԱԳՆ մամլո ծառայության հաղորդմամբ, նախօրեին ՌԴ ԱԳ նախարարի տեղակալ Գրիգորի Կարասինն իրանցի գործընկեր Իբրահիմ Ռահիմպուրի հետ Մոսկվայում քննարկել է ղարաբաղյան հակամարտության կարգավորման հարցը: Դիվանագետները մտքեր են փոխանակել հակամարտության կարգավորման հնարավոր տարբերակների մասին: Ավելի վաղ, Իրանի ԱԳՆ-ի պաշտոնական ներկայացուցիչ Հուսեյն Ջաբեր Անսարին հայտարարել է, որ Թեհրանը պատրաստ է հանդես գալ որպես միջնորդ Ադրբեջանի և Հայաստանի միջև ղարաբաղյան հակամարտության կարգավորման հարցում: ԱՊՀ ինստիտուտի եվրասիական ինտեգրացիայի և ՇՕՍ-ի զարգացման բաժնի ղեկավար Վլադիմիր Եվսեևը վերոնշյալ հայտարարությունը դիտարկում է որպես դրական երևույթ հայկական կողմի համար:
«Նախ, Իրանը դեմ է ՆԱՏՕ-ի խաղաղապահների մասնակցությանը: Նման մոտեցումն ամբողջությամբ համահունչ է Հայաստանի ազգային շահերին: Երկրորդ, Իրանը ներկայումս բարդ հարաբերություններ ունի Ադրբեջանի հետ, այդ իսկ պատճառով չեմ կարծում, որ բանակցություններում Իրանը կսատարի Բաքվին: Այս հարցում ավելի շատ պետք է Ադրբեջանը մտահոգվի», —RUSARMINFO-ի հետ զրույցում ասել է Եվսեևը: Ըստ փորձագետի` Բաքուն ոչ միայն կմատհոգվի, այլ նաև կընդդիմանա Իրանի մասնակցությանը ղարաբաղյան կարգավորման խաղաղապահների խմբին: «Հաշվի առնելով Ադրբեջանի և Իրանի փոխադարձ տարածքային նկատառումները, ինչպես նաև Իրանի և Հայաստանի մերձեցումը Թեհրանի հանդեպ պատժամիջոցների չեղարկումից հետո, Ադրբեջանը դեմ կարտահայտվի Իրանի միջամտությանը ղարաբաղյան հակամարտությանը», — ընդգծել է Եվսեևը:
Այս բարդ իրավիճակում Իրանի դերակատարումը Մինսկի խմբի գործունեությանը զուգահեռ կարող է դրական արդյունք ունենալ, — նշում է ՌԳԱ Արևելագիտության ինստիտուտի ավագ գիտաշխատող, իրանագետ Վլադիմիր Սաժինը: «Իրանը դեռ անցյալում էր հայտարարում, որ պատրաստ է միջնորդ դառնալ Հայաստանի և Ադրբեջանի միջև: Իրանը Հայաստանի հետ դրական քաղաքական և տնտեսական հարաբերություններ ունի: Կարծում եմ, որ Իրան գումարած Մինսկի խումբ համադրությունը կարող է դառնալ ղարաբաղյան հակամարտության կարգավորման լավ տարբերակ», — RUSARMINFO-ի հետ զրույցում ասել է Սաժինը: Արտաքին քաղաքականության հարցերում նախաձեռնողականության դրսևորումն ու Հարավային Կովկասում դերակատարման մեծացումը բխում է Իրանի շահերից, և սա համահունչ է Իրանի շուրջ վերջին շրջանում ընթացող քաղաքական և տնտեսական գործընթացներին, — ասում է «Քաղաքական փորձագիտական խմբի» ղեկավար, քաղաքագետ Կոնստանտին Կալաչյովը: «Այս հարցում Իրանի միջամտությունն ավելի քան տեղին է, բայց պետք է նկատի ունենալ նաև Ադրբեջանի բավականին բարդ հարաբերությունները Իրանի հետ: Միջնորդը պետք է անաչառ և անկողմնակալ լինի: Խիստ կասկածում եմ, որ Բաքուն կընդունի այդ առաջարկը, որովհետև Իրանը որոշակի առումով հայամետ դիրքորոշում ունի»: Ըստ փորձագետի` Իրանը գիտակցում է, որ դժվար թե այդ առաջարկն ընդունվի բոլոր կողմերից, բայց այն չի հրաժարվում բարձրացնելու իր հեղինակությունը միջնորդի կարագավիճակում Հարավային Կովկասում` այդպիսով ցուցադրելով նախաձեռնողականություն արտաքին քաղաքականության ոլորտում: Հիշեցնենք, որ Լեռնային Ղարաբաղի շուրջ հակամարտությունը սկիզբ է առել 1988-ին: Դրա կարգավորմամբ զբաղվում է ԵԱՀԿ Մինսկի խումբը` Ռուսաստանի, ԱՄՆ-ի և Ֆրանսիայի համանախագահությամբ: