ՌԴ Պետական դումայի ԱՊՀ, եվրասիական ինտեգրման և հայրենակիցների հետ կապերի հարցերով հանձնաժողովի նախագահ Լեոնիդ Սլուցկին, «Ռուսաստանն այսօր» գործակալությունում տեղի ունեցած մամլո ասուլիսին պատասխանելով RUSARMINFO-ի թղթակցի հարցին, մեկնաբանել է ՀԱՊԿ անդամ պետությունների նիստին Սերժ Սարգսյանի ելույթը, որում ՀՀ նախագահը հստակ ներկայացրել էր տարածաշրջանում տիրող իրավիճակը:
Ըստ նրա` Ռուսաստանի և Հայաստանի դիրքորոշումները Լեռնային Ղարաբաղի հակամարտության սրման հարցում Թուրքիայի դերակատարման վերաբերյալ «էապես» համընկնում են:
«Հայաստանի նախագահի խիստ հայտարարությունը, նրա և մյուս բազմաթիվ հայ քաղաքական գործիչների հռետորաբանությունը տարածաշրջանում թուրքական քաղաքականության շուրջ համահունչ են մեր դիրքորոշմանը: Այսօր մեր դիրքորոշումներն ու գնահատականները էապես համընկնում են», — ասել է Սլուցկին:
Պետդումայի պատգամավորը վստահ է, որ եթե Ռուսաստանը ցանկանում է իր դաշնակիցներից ստանալ աջակցություն, ապա նա պետք է կշռադատի, չափավորի իր հռետորաբանությունը տարբեր հարցերում:
Լեոնիդ Սլուցկիի կարծիքով, Թուրքիայի ներկայիս իշխանության պարագայում Ռուսաստանը չի կարող ճնշում գործադրել և ազդել Հարավկովկասյան տարածաշրջանում թուրքական քաղաքականությունը փոխելու վրա:
Հիշեցնենք, որ դեկտեմբերի 21-ին Մոսկվայում տեղի ունեցած ՀԱՊԿ-ի հավաքական անվտանգության խորհրդի նիստին Հայաստանի նախագահը կոչ է արել իր գործընկերներին ուշադրություն դարձնել Լեռնային Ղարաբաղի հակամարտության սրման գործում Թուրքիայի դերակատարմանը` ընդգծելով, որ Ադրբեջանի կողմից հայկական դիրքերի գնդակոծումը համազոր է Մոսկվայի, Մինսկի, Աստանայի, Դուշանբեի և Բիշքեկի գնդակոծություններին: