Դորտմունդի «Բորուսիայի» կիսապաշտպան Հենրիկ Մխիթարյանին կարող են արգելել մուտք գործել Բաքու, որտեղ 2015թ. հոկտեմբերի 23-ին Եվրոպայի մրցաշարի խմբակային փուլի շրջանակներում գերմանական թիմը կհանդիպի ադրբեջանական «Գաբալային»:
Նման բովանդակությամբ հոդված է հրապարակել ադրբեջանական azerisport.com կայքը` ընդգծելով, որ գերմանական թիմի մարզիկի մուտքի արգելքի պատճառ կարող է լինել այն հանգամանքը, որ Մխիթարյանն այցելել է Լեռնային Ղարաբաղ:
«Եթե խոսենք մարզական կանոններով, ապա Ադրբեջանը պարտավոր է թույլատրել Հենրիխ Մխիթարյանի մուտքը երկիր: Եթե մարզիկին թույլ չտան մասնակցել Գաբալա-Դորտմունդի Բորուսիա խաղին, ապա կամ Հենրիխ Մխիթարյանը կամ էլ ֆուտբոլային թիմը պետք է դիմի ՈՒԵՖԱ», — RUSARMINFO-ի հետ զրյուցում ասել է Ռուսաստանի ֆուտբոլային միության տնօրենի պաշտոնակատար Նիկիտա Սիմոնյանը:
Ադրբեջանը որևէ օրինական հիմքեր չունի, որպեսզի Հենրիխ Մխիթարյանին արգելի հանդես գալ իր իսկ ակումբի կազմում Ադրբեջանում: Եթե Բաքուն ստեղծի խոչընդոտներ, ապա դա կլինի ֆուտբոլային կանոնների կոպիտ խախտում: Տրամաբանությունից դուրս է քաղաքական պատճառներից ելնելով` Մխիթարյանին թույլ չտալ մասնակցել այդ խաղին, համոզված է ՌՖՄ-ի ղեկավարը:
Նիկիտա Սիմոնյանը նաև հիշեցրել է ՈՒԵՖԱ-ի փորձի մասին, որը քաղաքական տարաձայնությունների պատճառով երբեմն թիմերը տարբեր խմբերում է ներառում: Եվ եթե այս պարագայում միջազգային կազմակերպությունը թույլատրել է նույն խմբում հանդես գալ ադրբեջանական Գաբալային և գերմանական Դորտմունդի Բորուսիային, որի կազմում է Հայաստանի ազգային հավաքականի խաղացողը, ապա ՈՒԵՖԱ-ն պարտավոր է ապահովել ֆուտբոլիստի մասնակցությունը Ադրբեջանում: