Ուկրաինական միսը հայերի քիմքին հաճո է

Հայաստանի Հանրապետությունն իր սահմաններն է բացել ուկրաինական անասնաբուծական արտադրանքի համար: Ուկրաինայի Ագրարային քաղաքականության նախարարության մամլո ծառայությունը հայտնում է, որ ընտանի անասունների, կաթնային և արտադրանքների ներմուծման շուրջ բանակցությունները հաջողությամբ են ավարտվել Հայաստանի և Ուկրաինայի միջև:

«Հայաստան ներմուծվող ապրանքների կարգի փոփոխումից հետո, ուկրաինական կողմը ուղարկել է ցուցակ` բաղկացած 65 վերամշակող ձեռնարկություններից, որոնք պատրաստ են իրենց արտադրանքն ներմուծել Հայաստան` համապատասխան Հայաստանի և Մաքսային միության պահանջների: Այդ ցուցակում ներառված 26 ձեռնարկությանը Հայաստանը թույլտվություն է տրամադրել` ներմուծելու անասնաբուծական արտադրանք: Ներկայումս ընթացքի մեջ են համապատասխան աշխատանքները մնացյալ 39 ուկրաինական ընկերությունների հարցում», — նշվում է հաղորդագրության մեջ:

Ուկրաինայի Ագրարային քաղաքականության և սննդամթերքի` եվրոպական ինտեգրման ուղղությամբ փոխնախարար Վլադիսլավա Ռուտիցկայան ընդգծել է Ուկրաինայի արտահանման ներուժի հարցում հայկական շուկայի բացման կարևորությունը:

«Հայաստանի շուկայի բացումը դրական ազդանիշ է միս և կաթնամթերք արտադրող ուկրաինական ձեռնարկությունների համար: Մենք շարժվում ենք ոչ միայն Եվրոպական միության ուղղությամբ, այլև դիվերսիֆիկացնում ենք անասնաբուծական արտադրանքի սպառումը», — նշել է նա:

Տեղեկանք: ՀՀ-ում Ուկրաինայի դեսպանության տվյալներով, ուկրաինական մսամթերքի ներմուծումը Հայաստան 2015թ.-ի առաջին եռամսյակում կազմել է ողջ ներմուծման 12%-ը, ինչը 14%-ով ավելի քիչ է` նախորդ տարվա նույն ժամանակահատվածի ցուցանիշի համեմատությամբ: Ցուցանիշների նվազումը պայմանավորված է Մաքսային միությանը, իսկ այնուհետև Եվրասիական միությանը միանալուց հետո ներկրվող ապրանքների շուրջ հայկական կողմի պահանջների փոփոխությամբ:

Տեղական արտադրողների ասոցիացիայի նախագահ Վազգեն Սաֆարյանը «RUSARMINFO»-ի հետ զրույցում նշել է, որ վերջին տարիներին Հայաստանը չի բավարարում սեփական կարիքներն ու ներկրում է միս տարբեր երկրներից:

«Հայաստանը մսի ներկրման կարիք ունի, քանի որ միս արտադրողները չեն ապահովում ներքին շուկան: Մենք ներկրում ենք միս տարբեր երկրներից` սկսած Բրազիլիայից և ավարտած Հնդկաստանով», — տեղեկացնում է Սաֆարյանը: Ըստ Հայաստանի Մաքսային ծառայության, չնայած գոյություն ունեցող փակասին` Հայաստանը մսամթերք է արտահանում Բելառուս, Իրան և Վրաստան:

Հայաստանի վիճակագրական ծառայության տվյալներով, Ուկրաինայի և Հայաստանի միջև ապրանքաշրջանառությունը 2014թ.-ին կազմել է 223 մլն դոլար, իսկ 2015թ.-ին ակնհայտ է դարձել տնտեսական համագործակցության նվազման միտումը: Այսպես, 2015թ.-ի առաջին եռամսյակում` 2014-ի նույն ժամանակահատվածի համեմատությամբ, Ուկրաինայի հետ երկկողմ համագործակցության ծավալը նվազել է 33%-ով` կազմելով 25,2 մլն դոլար: Ուկրաինայից Հայաստան արտահանումը կրճատվել է 32%-ով` կազմելով 23,2 մլն դոլար, իսկ Հայաստանից Ուկրաինա արտահանումը կրճատվել է 46%-ով` կազմելով 2 մլն դոլար: