Սերգեյ Նարիշկինը ապրիլի 24-ին կայցելի Թուրքիա
ՌԴ Պետդումայի նախագահ Սերգեյ Նարիշկինը հաջորդ շաբաթ կմեկնի Թուրքիա, որտեղ կմասնակցի Գալիպոլիի ճակատամարտի 100-ամյա տարեդարձին նվիրված միջոցառումներին: Այս մասին տեղեկացնում է «ՌԻԱ-Նովոստի» լրատվական գործակալությունը: «Ինձ բախտ է վիճակվել հաջորդ շաբաթ լինել Թուրքիայում, այս անգամ Ստամբուլում Դարդանելիի ճակատամարտի 100-ամյակը տոնելու նպատակով», — ասել է Սերգեյ Նարիշկինը Թուրքիայի խորհրդարանի նախագահ Ջեմիլ Չիչեքի հետ հանդիպման ժամանակ: Նշենք, որ պրոպագանդելով Գալիպոլիի ճակատամարտի 100-ամյակին նվիրված միջոցառումները՝ Թուրքիան փորձում է քողարկել Հայոց Ցեղասպանության պատմական փաստը և շեղել միջազգային հանրության ուշադրությունը Հայոց ցեղասպանության 100-ամյա տարելիցին նվիրված միջոցառումներից: Հիշեցնենք, որ ՀՀ նախագահ Սերժ Սարգսյանը հրավիրել էր Թուրքիայի նախագահ Ռեջեփ Թայիփ Էրդողանին 2015 թվականի ապրիլի 24-ին այցելել Հայաստան և մասնակցել Հայոց ցեղասպանության 100-ամյա տարելիցին նվիրված միջոցառումներին: Ի պատասխան այս քայլի ՝ Էրդողանը Սարգսյանին հրավիրեց Թուրքիա Գալիպոլիի ճակատամարտի 100-ամյա տարելիցի տոնակատարություններին մասնակցելու համար: