Rusarminfo Российско-Армянское информационное агентство
Այսօր Սիրիայի տարածքում խոցվել է ռուսական Սու-24 ռազմական օդանավը: Թուրքիայի ռազմական գերատեսչությունը պնդում է, որ ռուսական օդանավը խոցվել է թուրքական F-16 կործանիչի կողմից Թուրքիայի օդային սահմանը հատելուց հետո: Բայց ՌԴ Պաշտպանության նախարարության հաղորդմամբ, տիեզերքից արված լուսանկարները հերքում են սահմանի խախտման փաստը:
Թուրքիան շարունակում է փրկել ԻՊ-ին, և Ռուսաստանի ռազմական օդանավի կործանումը նույն շղթայի շարունակությունն է, — պնդում է Մերձավոր Արևելքի ինստիտուտի տնօրեն Եվգենի Սատանովսկին:
«ԻՊ-ի ահաբեկիչների հետ առևտուր անող և նրանց տարանցումը Սիրիա ապահովող երկրի համար ռուսաստանյան օդանավի կործանումը օրինական է », — RUSARMINFO-ի հետ զրույցում ասել է Սատանովսկին:
Ըստ փորձագետի` Թուրքիան հարվածներ է հասցնում բոլոր այն ուժերին, որոնք պայքար են մղում ահաբեկիչների դեմ և Սիրիայի հյուսիսը դիտարկում է որպես սեփական տարածք:
«Նման պայմաններում, բնականաբար, Ռուսաստանի ՕՏՈՒ-ի գործողությունները հակասում են Անկարայի շահերին, քանի որ դրանք ուղղված են ահաբեկիչների ոչնչացմանը, և այս իրավիճակում Էրդողանը ոչ ադեկվատ պահվածք է դրսևորում », — նշել է Եվգենի Սատանովսկին:
Նշենք, որ Թուրքիայի բարձրաստիճան ղեկավարությունը արդեն իսկ հաստատել է ռուսաստանյան կործանիչի ոչնչացման փաստը, բայց դեռևս խուսափում է որոշակի գնահատական ներկայացնելուց:
